Saytda audio qo'llab-quvvatlash mavjud bo'lib, matnni eshitish uchun ushbu funksiya holatini tanlab qo'ying va kerakli matnni sichqoncha bilan belgilang
Har qanday jamiyat, tashkilot yoki korxonada har bir inson yoki xodimni qiyin ahvolga tushiradigan, ruhan ezadigan holatlar ichida eng ogʻiri adolatsizlikdir. Adolatsizlikning bir ildizi esa korrupsiya bilan bogʻliq boʻlib, bu shaxsning oʻz mansab yoki xizmat mavqeyidan shaxsiy manfaatlari yoxud oʻzga shaxslarning manfaatlarini koʻzlab, moddiy naf olish maqsadida qonunga xilof ravishda foydalanishi ifodalanadi.
“Hududgaz Andijon” gaz taʼminoti filialida “Korrupsiya – taraqqiyot kushandasi” mavzusida davra suhbati oʻtkazildi. Unda Andijon viloyat iqtisodiy jinoyatlarga qarshi kurash departamenti vakillari, Filialning “Moddiy resurslardan oqilona foydalanish va korrupsiyaga qarshi siyosatni amalga oshirish” boʻlimi mutaxassislari, shahar-tuman gaz taʼminoti boʻlimi boshliqlari va muhandislari ishtirok etdilar.
Tadbirda soʻzga chiqqanlar tomonidan, korrupsiya va tamagirlikka yoʻl qoʻymaslik, uning oqibatlari haqida aytib oʻtildi hamda ushbu xatti-harakat yuzasidan qonunchilik bazasi mustahkamlab qoʻyilganligi, jazoning muqarrarligi toʻgʻrisida tushuntirishlar berildi. Shuningdek, korrupsiya illatini yoʻqotish, unga qarshi kurashda har bir fuqaroning masʼul ekanligi uqtirildi, mavzuga oid qonun va qarorlarning ahamiyati haqida batafsil soʻz yuritildi.
Xulosa sifatida aytish mumkinki, xalqimizning tom maʼnodagi adolat qaror topgan jamiyatda yashashi uchun nafaqat masʼul shaxslar, balki har bir fuqaro oʻz hissasini qoʻshishi shart. Bu fuqarolarimizda korrupsiyaga, aniqroq aytganda, har qanday qonunbuzarlikka nisbatan murosasizlik kayfiyati, madaniyati shakllanishiga ham bogʻliq. Chunki har qanday qonunbuzarlik sodir etilishiga, koʻpayishiga koʻp hollarda fuqarolarimizning befarqligi, loqaydligi sabab boʻlmoqda. Barchaning yakdilligi, yurt taqdiriga daxldorligi kuchayishi har qanday illatning batamom barham topishiga xizmat qiladi.
“Hududgaz Andijon” gaz taʼminoti filiali matbuot xizmati