Saytda audio qo'llab-quvvatlash mavjud bo'lib, matnni eshitish uchun ushbu funksiya holatini tanlab qo'ying va kerakli matnni sichqoncha bilan belgilang
“Hududgaz Toshkent” gaz taʼminoti filiali xodimlari tomonidan viloyat boʻylab profilaktik tadbirlar oʻtkazildi. Tadbirlar davomida ulgurji isteʼmolchilar orasida tabiiy gazdan noqonuniy foydalanish holatlari aniqlandi.
Qibray tumani “Haydarobod” MFYda joylashgan “Maxpura Ona Agro Plus” MCHJga qarashli issiqxona 2023-yilning dekabr oyida tabiiy gazdan noqonuniy foydalangani uchun tarmoqdan ajratilgan boʻlsada, gaz tarmogʻiga noqonuniy ravishda qayta ulanib, tabiiy gazdan foydalangani maʼlum boʻldi.
Sarflangan tabiiy gaz hajmi qonunchilikda belgilangan tartibda qayta hisob-kitob qilindi va barcha hujjatlar huquqni muhofaza qiluvchi tashkilotlarga yuborildi. Qayd etish joiz, bundan avvalgi holat boʻyicha mazkur korxonaga Toshkent shahar departamenti tomonidan jinoyat ishi qoʻzgʻatilgan edi.
Yana bir noqonuniy holat Ohangaron tumanida qayd etildi. Tumanning “Shodmalik” MFY hududidagi “Ohangaron Pure Petrol” MCHJga qarashli AGTKSHda hisobdondan tashqari yashirincha gaz quvuri ulanib, tabiiy gazdan noqonuniy foydalanib kelingani aniqlandi. Holat boʻyicha dalolatnoma rasmiylashtirilib, hozirda sarflangan gaz hajmini qayta hisob-kitob qilish ishlari amalga oshirilmoqda.