Saytda audio qo'llab-quvvatlash mavjud bo'lib, matnni eshitish uchun ushbu funksiya holatini tanlab qo'ying va kerakli matnni sichqoncha bilan belgilang
Tabiiy gazdan oqilona foydalanish har bir isteʼmolchining burchi hisoblanishi lozim. Boisi bir kub gaz ham oʻlchovli, u cheksiz chegarasiz emas. Oʻz qiymati va bahosiga ega. Afsuski, oramizda tabiiy gazdan oʻgʻrincha foydalanib, unga noqonuniy ulanib olayotganlar ham yoʻq emas.
“Hududgaz Navoiy” gaz taʼminoti filiali tomonidan shahar, tumanlar kesimida oʻtkazilayotgan reyd tadbirlarida ana shunday ayrim isteʼmolchilar aniqlanmoqda.
Jumladan, oʻtkazilgan nazorat tadbirlaridan birida Karmana tumani “Allon” MFY “Yangiobod” koʻchasida yashovchi B. M. yashash xonadonida 1 dona oʻchoqda yem pishirish maqsadida noqonuniy tarzda gaz tarmogʻiga ulanib, undan foydalanib kelayotganligi aniqlandi. Shuningdek, Xatirchi tumani “Samarqand” MFYda yashovchi A. B. ham xonadonidan elektron gaz hisoblash uskunasidan oldin yer ostidan yashirincha noqonuniy tarzda rezina shlang orqali quvurga ulanib, tabiiy gazdan foydalanib kelgani aniqlandi. Mazkur ikkala holat ham gaz taʼminoti xodimlari tomonidan tezkor bartaraf etildi va tegishli tartibda dalolatnoma rasmiylashtirildi.
Tabiiy gazdan noqonuniy foydalanish holatlariga yana bir nechta misollarni keltirish mumkin. Xalqimizning boyligi hisoblangan tabiiy gazdan yashirincha foydalanish, hisobini toʻlamay faqat oʻz manfaatini oʻylash oqibati xayrli tugamasligini ayrim isteʼmolchilar yaxshi bilishi shart.
Shunday ekan, tabiiy gazdan toʻgʻri va halol foydalaning. Har bir ishlatilgan kub gaz uchun haqini toʻlash majburiyligini unutmang!
“Hududgaz Navoiy” gaz taʼminoti filiali matbuot xizmati