Saytda audio qo'llab-quvvatlash mavjud bo'lib, matnni eshitish uchun ushbu funksiya holatini tanlab qo'ying va kerakli matnni sichqoncha bilan belgilang
“Hududgazta’minot” AJ Birlashgan kasaba uyushma qo‘mitasi tizimidagi boshlang‘ich kasaba uyushma qo‘mitalari raislari va hisobchilari uchun o‘quv-seminar bo‘lib o‘tdi
Ma’lumki, yurtimizda kasaba uyushmalari erkin va keng ko‘lamli faoliyat yuritishi uchun barcha zarur sharoitlar yaratilgan. Xususan, keyingi yillarda kasaba uyushmalari va ish beruvchilar o‘rtasidagi munosabatlar va ishtimoiy sherikchilik asosida yangi bosqichga ko‘tarilmoqda. Joriy yilning 2-5 fevral kunlari "Hududgazta’minot" AJ Birlashgan kasaba uyushma qo‘mitasi tizimidagi boshlang‘ich kasaba uyushma qo‘mitalari raislari va hisobchilari uchun o‘quv-seminar bo‘lib o‘tdi. O‘quv seminarida O‘zbekiston Energetika neft gaz geologiyasi xodimlari kasaba uyushmasi respublika kengashidan mutaxassislari Zayufat Ibragimova, Raxmatilla Djurayev, Boburmirzo Abdullayev, Ibrohim Isoqov ishtirok etdi.
O‘quv-seminar boshlang‘ich tashkilotning o‘rni, ish beruvchi bilan kasaba uyushma qo‘mitasi raisi muzokaralarni qay holatda olib borilishiga oid interfaol usullar, davra suhbati tariqasida qizg‘in muzokaralarga boy bo‘ldi. Jamoa shartnomalarining bajarilishi ustidan nazorat, mehnatga doir va mehnatni muhofaza qilish to‘g‘risidagi normativ-huquqiy hujjatlarga rioya etilishi ustidan jamoatchilik nazorati yuzasidan qo‘shimcha ma’lumotlar berildi va fikr almashildi.
"Hududgazta’minot" AJ markaziy apparati, filiallar, shahar va tuman gaz bo‘limlari, joylardagi gaz to‘ldirish shoxobchalari va gaz to‘ldirish stansiyalarining ishchi-xodimlariga qulay va xavfsiz mehnat sharoitlarini yaratish, xonalarning yorug‘ligi, harorati, stol-stullar, nusxa ko‘chirish apparati hamda printerlar, zarur ish qurollari bilan ta’minlanishida amaliy ishlarni olib borish lozimligi ta’kidlandi. Boshlang‘ich kasaba uyushmalari mas’ullariga yil davomida o‘tkaziladigan ko‘rik-tanlovlariga ishtirok etish tavsiya qilindi.
Shuningdek, filiallar boshlang‘ich kasaba uyushma qo‘mitalari o‘z faoliyatlarida o‘rnatilgan qonuniy talab va tartiblar asosida ish yuritishlari lozimligi eslatib o‘tildi. Bundan tashqari, seminarda mamlakatimizda nishonlanadigan milliy va davlat bayramlari munosabati bilan belgilanayotgan dam olish kunlarida ishchi-xodimlarga madaniy va sport tadbirlari o‘tkazishga e’tibor qaratish masalasi ham muhokama qilindi. Uch kun davom etgan seminar ishtirokchilarda o‘zgacha bir taassurot qoldirdi, desak, mubolag‘a bo‘lmaydi. Zero, har qanday tashkilotdagi qulay shart-sharoitlar ishchi-xodimlarning kayfiyati va ish unumining samarali o‘sishiga xizmat qiladi. Qolaversa, korxonada kasaba uyushmasining va jamoa shartnomasining mavjudligi ish beruvchining o‘z mehnat faoliyatini qonuniy hamda adolatli olib borishi uchun ko‘mak vazifasini o‘taydi. Seminar davomida xodimlar o‘rtasida sport tadbirlari ham tashkil etildi. Hududlardan tashrif buyurgan Boshlang‘ich kasaba uyushma qo‘mitalari raislari va hisobchilari o‘rtasida stol tennisi, shaxmat va shashka musobaqalari o‘tkazildi. Faol ishtirokchilar rag‘batlantirildi.
"Hududgaz Surxondaryo" gaz ta'minoti filiali matbuot xizmati