Saytda audio qo'llab-quvvatlash mavjud bo'lib, matnni eshitish uchun ushbu funksiya holatini tanlab qo'ying va kerakli matnni sichqoncha bilan belgilang
Tabiiy boyliklarimiz qatorida tabiiy gazni ham tejab ishlatish, ortiqcha isrof qilmaslik bugungi kunda dolzarb masalaga aylanmoqda. Vazirlar Mahkamasining 204-sonli qaroridan koʻzlangan asosiy maqsad ham tabiiy gazni iqtisod qilishga qaratilgan. Shu maʼnoda isteʼmolchilarga tabiiy gazni tejashda avvalo, nimalarga ahamiyat qaratishlari lozimligi ham soha xodimlari tomonidan boʻlib oʻtayotgan targʻibotlarda keng tushuntirilmoqda.
Qayd etish lozim, maʼnan eskirgan gaz jihozlaridan voz kechish ham tabiiy gazni iqtisod qilishda samarali hisoblanadi. Energiya tejamkor gaz yondirgichlarini oʻrnatish gaz sarfini kamaytirish bilan birga xavfsizlik avtomatikasiga egaligi uchun isteʼmolchilarga qulay va maʼqul kelmoqda.
Navoiy shahrining “Oʻzbekiston” mahallasida yashovchi Murod ota Rizayev ham maʼnan eskirgan gaz jihozi oʻrniga zamonaviy energiya tejamkor gaz yondirgich oʻrnatdi.
– Tejamkor gaz jihozlarini samarasi ancha sezildi, — deydi M. Rizayev. – Avvallari tabiiy gazga toʻlovimiz koʻp boʻlardi, hozir 200-300 mingga yaqin pul tejalyapti. Ham gazni, ham pulni iqtisod qilyapmiz, bundan xursandmiz albatta. Mahallamizdagilarga ham zamonaviy gaz jihozlarini oʻrnatishlarini tavsiya qildim. Tabiiy gaz –boyligimiz, uni tejab ishlatsak kelajak avlodga yetkazib berishga, kelgusida taqchillik boʻlmasligiga hissamizni qoʻshgan boʻlamiz.
Aytish kerakki, “Navoiyshahargaz” gaz taʼminoti boʻlimi tomonidan mahallalar kesimida tabiiy gazdan oqilona foydalanish, uni tejashga doir muntazam targʻibotlar oʻtkazib kelinmoqda. Gaz taʼminoti boʻlimi xodimlari, mahalla gazchisi va chilangarlari “Oʻzbekiston” mahallasida ham boʻlib, aholi xonadonlarida mavzu yuzasidan tushuntirish va targʻibot ishlarini olib borishdi.
– “Oʻzbekiston” mahallasida mingdan ortiq tabiiy gaz isteʼmolchisi mavjud, — deydi “Navoiyshahargaz” gaz taʼminoti boʻlimi xodimi Ruslan Aleksandrov. – Targʻibotlarimizda barcha xonadonlarni qamrab olishni koʻzda tutganmiz. Har bir isteʼmolchi, birgina shu mahalla misolida olsak, bir kubdan gazni tejasa ham, bir kunda 1000 kub gaz tejaladi. Bunda energotejamkor gaz uskunalarini oʻrnatish ham juda foydali. Zamonaviy gaz yondirgichlari 30-40 foizgacha tabiiy gazni tejash imkoniga egaligini tushuntiryapmiz.
Isteʼmolchilar tomonidan bu kabi zamonaviy gaz uskunalarini xarid qilish va oʻrnatishga qiziqish ortib boryapti. Bu esa tabiiy boyligimiz boʻlgan gazni tejashga hissa qoʻshishi bilan ahamiyatlidir.
“Hududgaz Navoiy” gaz taʼminoti filiali matbuot xizmati