Saytda audio qo'llab-quvvatlash mavjud bo'lib, matnni eshitish uchun ushbu funksiya holatini tanlab qo'ying va kerakli matnni sichqoncha bilan belgilang
Maʼlumki, mamlakatimizda yoshlarning boʻsh vaqtlarini mazmunli tashkil etish maqsadida qator loyihalar, tadbirlar amalga oshirilmoqda. Bunga Prezidentimizning “Zakovat” intellektual oʻyinini aholi oʻrtasida ommaviy maʼrifiy harakatga aylantirish va boshqa intellektual oʻyinlarni rivojlantirishga oid chora-tadbirlari toʻgʻrisidagi PQ-96 sonli qarori dasturulamal boʻlmoqda.
“Hududgaz Navoiy” gaz taʼminoti filiali va boʻlimi xodimlarining boʻsh vaqtlarini mazmunli tashkil etish, ularni madaniyat, sanʼat, sport va intellektual oʻyinlarga keng jalb etish maqsadida filial Boshlangʻich kasaba uyushmasi tomonidan “Zakovat” intellektual oʻyinlari oʻtkazildi. Unda filial va barcha tuman shahar gaz taʼminoti boʻlimi xodimlari 8 ta jamoaga boʻlingan holda bilim va zukkoliklarini sinovdan oʻtkazishdi. Qizgʻin bahs-munozaralarga boy boʻlgan oʻyinda birinchilikni “Navbahortumangaz” gaz taʼminoti boʻlimi egallagan boʻlsa, ikkinchi oʻrin filial jamoasiga, uchinchi oʻrin esa “Karmanatumangaz” gaz taʼminoti boʻlimi xodimlariga nasib etdi.
– Intellektual oʻyinda bir-biridan qiziqarli savollarga javob topishga harakat qildik, — deydi “Navbahortumangaz” gaz taʼminoti boʻlimi gʻolib jamoasi ishtirokchisi Adiz Islomov. – Jamoamiz bilan bilim, aql, tafakkurimizni ishga solib toʻgʻri javobni aniqlashga intildik. Harakatlarimiz zoye ketmadi, gʻoliblikni qoʻlga kiritganimizdan xursandmiz. Bu kabi tadbirlar tez-tez oʻtkazilib turilsa degan niyatdamiz.
Shuningdek, shahrimizdagi Alisher Navoiy nomidagi madaniyat va istirohat bogʻida tashkil etilgan sport musobaqasi ham qizgʻin tus oldi. Unda gaz taʼminoti korxonasi xodimlari 100 va 1000 metr masofaga yugurishda epchilliklarini namoyish etishdi. 100 metrga yugurishda “Konimextumangaz” gaz taʼminoti boʻlimi xodimi Nurbek Egamov barcha raqiblarini ortda qoldirib birinchi oʻrinni qoʻlga kiritdi. 2-oʻrinni “Nurotatumangaz”dan Toyir Jiyanov, 3-oʻrinni “Qiziltepatumangaz”dan Ruslan Sharipovlar egallashdi.
Ming metrga yugurish bahslari ham murosasiz tarzda oʻtdi. Finish chizigʻiga birinchilardan boʻlib “Karmanatumangaz” GTB dan Dilmurod Imomov yetib kelib gʻolib deb topildi. Keyingi oʻrinlar esa “Navbahortumangaz” GTB xodimlari Qudrat Habibov va Sardor Ubaydullayevlar loyiq deb topildi.
Oʻyin va sport musobaqalari soʻngida gʻolib hamda sovrindorlarga filial boshlangʻich kasaba uyushmasi tomonidan faxriy yorliq va esdalik sovgʻalari topshirildi.
“Hududgaz Navoiy” gaz taʼminoti filiali matbuot xizmati