Saytda audio qo'llab-quvvatlash mavjud bo'lib, matnni eshitish uchun ushbu funksiya holatini tanlab qo'ying va kerakli matnni sichqoncha bilan belgilang
“28 aprel – Butunjahon mehnatni muhofaza qilish kuni” munosabati bilan “Hududgaz Andijon” gaz taʼminoti filiali va boshlangʻich kasaba uyushma qoʻmitasi tomonidan seminar tashkil etildi. Unda Andijon viloyati Kambagʻallikni qisqartirish va bandlik bosh boshqarmasining davlat mehnat nazorati inspektorlari, Filial boʻlim boshliqlari, shahar-tuman gaz taʼminoti boʻlimlarining mehnat muhofazasi va texnika xavfsizligi boʻyicha yetakchi muhandislari va kasaba uyushma qoʻmita raislari ishtirok etdilar.
“Mehnat qonunchiligiga doir tizimdagi yangiliklardan biri, bu — mehnat muhofazasi, sanoat xavfsizligi va atrof-muhitni muhofaza qilish boʻyicha integrallashgan menejment tizimining samarali ishlashini taʼminlash maqsadida “Hududgaztaʼminot” AJning mehnat muhofazasi va sanoat xavfsizligi sohasida siyosati”ning ishlab chiqilib, amaliyotga joriy etilganligidir, — deydi Filiali boshlangʻich kasaba uyushma qoʻmitasi raisi Gulchehraxon Mamatxoʻjaeva. – ISO 14001 va ISO 45001 xalqaro standartlar talablariga muvofiq ishlab chiqilgan mazkur siyosat mehnat muhofazasi, sanoat xavfsizligi va atrof-muhit muhofazasi sohasidagi asosiy ustuvor yoʻnalish, maqsad, vazifa va masʼuliyatni belgilab beradi”.
Seminar davomida mehnat muhofazasi va sanoat xavfsizligi sohasidagi siyosatda ishchi-xodimlar hayoti va sogʻligʻi ustuvorligini taʼminlash, ishlab chiqarishdagi jarohatlanishlar hamda kasb kasalliklarining oldini olish ustuvor vazifa sanalishi alohida taʼkidlandi.
Shu kuni boshlangʻich kasaba uyushma qoʻmitasi tomonidan sohada faoliyat koʻrsatib, ish joyida jarohat olgan mutaxassislar yoki vafot etgan 21 nafar ishchi-xodimlarning oilalaridan xabar olindi. Oziq-ovqat mahsulotlari bilan yoʻqlangan xizmatchilar va ularning oilalari suhbatlar davomida minnatdorliklarini izhor etishib, duoga qoʻl ochdilar.
“Hududgaz Andijon” gaz taʼminoti filiali matbuot xizmati