Ijtimoiy faoliyat

 “Hududgaztaʼminot” aksiyadorlik jamiyati tomonidan mamlakatimizda ekologik vaziyatni yaxshilash, yashil maydonlarni kengaytirishga hissa qoʻshish maqsadida “Yashil makon” umummilliy loyihasi doirasida “Kelajak avlod uchun 100 mingta daraxt” shiori ostida daraxt va koʻchatlar ekish aksiyasi oʻtkazilmoqda.

Umummilliy harakatning bir qismi sifatida har bir shahar va tumanda, mahalla va qishloqda “yashil bogʻlar” va “yashil jamoat parklari”ni barpo etish maqsad qilingan. Shu kunlarda mahalla, qishloqlarda kuzgi daraxt nihollarini oʻtqazish mavsumi qizgʻin davom ettirilmoqda.

Jumladan, “Hududgaz Buxoro” va “Hududgaz Poytaxt” gaz taʼminoti filiallari tomonidan ham loyiha doirasida samarali ishlar boshlab yuborildi. Shahar va tuman gaz taʼminoti boʻlimlarida obodonlashtirish ishlari tashkil etilmoqda. Gaz taʼminoti boʻlimi xodimlari ishtirokida 700 tupdan ortiq mevali daraxtlar va manzarali gul koʻchatlari ekildi.

“Hududgaztaʼminot AJ” matbuot xizmati