Saytda audio qo'llab-quvvatlash mavjud bo'lib, matnni eshitish uchun ushbu funksiya holatini tanlab qo'ying va kerakli matnni sichqoncha bilan belgilang
“Qiyin. Lekin afsuslanmaganman. Men ishimni yaxshi ko’raman”.
Suhbat davomida chilangar Muborak opaning birinchi tilga olgan o’ylari shu bo’ldi. Qariyb 20 yillik ish tajribasi bor qahramonimiz bugun jamoadoshlari orasida o’z hurmatiga ega. Gaz ta’minotida ishini nazoratchilikdan boshlagan. Ustozlar ko’magida tinim bilmadi. Bugunga esa shogirdlari bisyor, endi o’zi ustoz.
“Qanday vazifada ishlamay, doim mas’uliyatni his etib kelishga harakat qilaman. Ishimiz shuni taqozo etadi. Chunki maqsad bitta – aholiga sifatli xizmat ko’rsatish”, – deydi chilangar opa.
2017-yildan boshlab "Kogongaz" gaz ta'minoti bo'limida chilangar vazifasida ishlab kelayotgan Muborak opa o’z ishidan mamnun ekanligini bot-bot takrorlaydi. Shubhasiz, kasbga bo’lgan mehri va sadoqatini uning fikrlaridan anglash qiyin emas. U har bir xonadonda bo’lganida xavfsizlik masalasiga alohida e’tibor qaratadi. “Gaz xo’jaligi qoidalariga rioya qilish mas’uliyatli vazifasi ekanligini iste’molchilarga doimiy aytib kelaman. To’g’ri, xavfsizlikni ta’minlash asosiy maqsadimiz, ammo bunga barchamiz birdek harakat qilsak, hech qanday baxtsiz hodisalar ham kelib chiqmaydi”, – deydi u ish jarayonlari davomida.
Chilangar opaning yana bir fikri e’tiborimizni tortishi tabiiy. “Ba’zi iste’molchilar xavfsizligiga juda befarq, – deydi u. Xonadonlarda bo’lganimizda gaz jihozlarining texnik ko’rigini o’tkazishga qarshilik qilishadi, kiritishmaydi. Shunday paytlar juda qiyin bo’ladi, ammo bu qiyinchiliklar bizga yanada kuchliroq mehnat qilishga undaydi. Ularning duosi sabab ham rohatda ishlayotganimizni his qilamiz”. Ish jarayoni bilan tanishar ekanmiz, Muborak opa o’z ishiga sadoqati kuchli ekanligini yana bir marotaba guvohi bo’ldik. U ayol, nozik xilqat. Ammo ishiga bo’lgan mehri ustunlik qiladi ba’zan. Qo’llari qavarib, qora moylar izini chizsa hamki uning mas’uliyati kuchini ko’rsatadi. Ishiga bo’lgan sadoqati esa bisyor.
Kasbining jonkuyari bugun mehnati ortidan rohat ko’rib kelmoqda. Oilada ham mehribon ona. Nevaralar zavqi bilan to’lib yashayotgan baxtli ayol hamdir.
“Hududgaz Buxoro” gaz ta’minoti filiali matbuot xizmati