Saytda audio qo'llab-quvvatlash mavjud bo'lib, matnni eshitish uchun ushbu funksiya holatini tanlab qo'ying va kerakli matnni sichqoncha bilan belgilang
“Hududgaz Navoiy” gaz taʼminoti filiali majlislar zalida oʻtkazilgan davra suhbati shunday nomlandi. Tadbir BMT Bosh Assambleyasi tomonidan eʼlon qilingan 25 noyabr – Xalqaro ayollarga nisbatan zoʻravonlikka barham berish kuniga bagʻishlandi.
Mamlakatimizda sana munosabati bilan yil 25 noyabrdan 10 dekabrgacha “Zoʻravonlikka qarshi 16 kun” turkum tadbirlar tashkil etilmoqda. Ayni mavzuda tashkil etilgan davra suhbatida ayollarni reabilitatsiya qilish va moslashtirish viloyat markazi vakillari, shuningdek, filial va tuman, shahargaz gaz taʼminoti boʻlimi xotin-qizlari ishtirok etdi.
Dastlab ayollarni reabiliatatsiya qilish va moslashtirish viloyat markazi mutaxassisi ushbu markazlar faoliyati haqida maʼlumot berib oʻtdi. Prezidentimizning 2021 yil 19 maydagi “Zoʻrlik ishlatishdan jabr koʻrgan xotin-qizlarni reabilitatsiya qilishga oid qoʻshimcha chora-tadbirlar toʻgʻrisida”gi Qarori asosida 2021 yil sentyabr oyida Ayollarni reablitatsiya qilish va moslashtirish Respublika markazi tashkil etildi. Markazning asosiy vazifasi tazyiq va zoʻravonlikdan jabr koʻrgan, oʻz joniga suiqasd qilgan yoki joniga qasd qilishga moyilligi boʻlgan xotin-qizlarga anonim tarzda yordam koʻrsatish va vaqtincha boshpanalarga joylashtirishdan iborat.
Davra suhbati davomida zoʻravonlikning turlari va uni oldini olishda markaz tomonidan amalga oshirilayotgan ishlar haqida ham gapirib oʻtildi.
– Markazimizda zoʻravonlikka uchrab murojaat qilgan ayollarga ruhiy va ijtimoiy yordam berish yoʻlga qoʻyilgan, — deydi markaz ijtimoiy xodimi Zulfiya Shomurodova. – Jumladan, zoʻravonlik va tazyiqdan aziyat chekkan ayollar va qizlarga tezkor yordam berish uchun qisqa raqamli 1146 (Navoiy viloyatiga 99-812-11-46) raqamli milliy ishonch telefoni orqali 24 soat davomida bogʻlanish imkoni mavjud. Bunda qoʻngʻiroq qilgan murojaatchiga tajribali psixologlarimiz tomonidan zarur yordam koʻrsatiladi. Shu bilan birga tazyiq va zoʻravonlikni oldini olish uchun xotin qizlarga nisbatan tazyiq va zoʻravonlik sodir etishga olib keladigan sabablar hamda shart-sharoitlarni aniqlash va bartaraf etish, ularga ijtimoiy, huquqiy, tibbiy va boshqa koʻmak koʻrsatish amalga oshirib kelinmoqda.
Tadbirda xotin-qizlarning huquqiy savodxonligi, ruhiy ijtimoiy barqarorligi ham jamiyatda oʻz oʻrnini topishda, zoʻravonlik qurboniga aylanib qolmaslikda muhimligi taʼkidlandi. Bundan tashqari, markaz psixologi Gulbahor Mahmudova tomonidan ong osti bilan ishlash, yaxshi niyatning kuchi va energiyani boyitish haqida qiziqarli maʼlumotlar berildi.
– Bugungi tadbirdan oʻzimiz uchun qiziqarli maʼlumotlarga ega boʻldik, — deydi “Qiziltepatumangaz” gaz taʼminoti boʻlimi xodimi Halima Karimova. – Psixologik oʻyinlar orqali ham hayot sevish, uning har daqiqasida shukrona bilan yashashlik daʼvat etildi. Bu kabi tadbirlar tez-tez oʻtkazib turilsa maqsadga muvofiq boʻlardi.
Davra suhbati soʻngida ishtirokchilarni qiziqtirgan savollarga mutaxassislar tomonidan javob qaytarildi.
“Hududgaz Navoiy” gaz taʼminoti filiali matbuot xizmati