Saytda audio qo'llab-quvvatlash mavjud bo'lib, matnni eshitish uchun ushbu funksiya holatini tanlab qo'ying va kerakli matnni sichqoncha bilan belgilang
“Moddiy resurslardan oqilona foydalanish va korrupsiyaga qarshi siyosatni amalga oshirish” boʻlimi xodimlari, filialning Suyultirilgan gazni sotishni muvofiqlashtirish boʻlimi va tuman gaz taʼminoti boʻlimining masʼul xodimlari ishtirokida joylarda reyd tadbirlari davom etmoqda.
Navbatdagi oʻrganish jarayoni viloyatning Vobkent, Shofirkon, Buxoro tumanlari va Buxoro shaharlarida boʻldi. Tadbirdan asosiy maqsad aholi isteʼmolchilarini suyultirilgan uglevodorod gaz bilan bir maromda taʼminlash, hududlarda faoliyat yuritib kelinayotgan oshxona, kafe, novvoyxonalarda aholi isteʼmolchilarga imtiyozli narxlarda yetkazib berilayotgan suyultirilgan gaz ballonlaridan foydalanish holatlarining oldini olish boʻlib, bu borada qator kamchiliklar aniqlandi. Birgina Vobkent tumani misolida fikrimizni davom ettirsak.
Tumanning Charmgaron mahallasi hududida joylashgan umumiy ovqatlanish oshxonasi koʻzdan kechirilganida, oshxonada tuman gaz taʼminoti boʻlimiga tegishli suyultirilgan gaz ballonidan foydalanib, taom pishirilayotganligi aniqlandi. Oshxona egasi bilan olib borilgan suhbat davomida ushbu maishiy gaz balloni imtiyozli narxlarda tuman gaz taʼminoti boʻlimi tomonidan aholi isteʼmolchilari uchun berilishi va undan tijorat maqsadida foydalanmaslik lozimligi tushuntirildi. Shuningdek, gaz ballonidan tijorat maqsadida foydalanish esa xavflilik darajasining yanada orttirilishiga sabab boʻlishi mumkinligi ham taʼkidlab oʻtildi, ogohlantirildi, dalolatnoma rasmiylashtirilib, gaz balloni olib qoʻyildi.
Bu kabi holatlar viloyatning Buxoro tumanida ham aniqlandi. Tumanning Istiqlol mahallasi Qoʻlba qishlogʻi hududida joylashgan umumiy ovqatlanish oshxonasi egasi gaz taʼminoti boʻlimiga tegishli boʻlgan maishiy gaz ballonidan foydalanib kelayotgan boʻlib, oʻrganishlar davomida gaz balloni unga tegishli emasligini qayd etdi. Bu boʻyicha tushuntirishlar berilib, dalolatnoma rasmiylashtirilib, gaz balloni olib qoʻyildi. Taʼkidlash lozim, reyd tadbirlari davomida soha xodimlari tomonidan har bir tadbirkor oʻz faoliyatini qonuniy olib borishi, aholiga tegishli boʻlgan maishiy gaz ballonlaridan umuman foydalanmasliklari haqida tushuntirildi.
“Hududgaz Buxoro” gaz taʼminoti filiali matbuot xizmati