Saytda audio qo'llab-quvvatlash mavjud bo'lib, matnni eshitish uchun ushbu funksiya holatini tanlab qo'ying va kerakli matnni sichqoncha bilan belgilang
Xalq davlat idoralariga emas, balki davlat idoralari xalqimizga xizmat qilishi kerak. Bugun ayni shu tamoyil asosida joylarda aholi murojaatlari xonadonma xonadon yurib, mahallabay oʻrganilmoqda. Shuningdek, sayyor qabullar tashkil etilmoqda. Murojaatlarning amaliy yechimi yuzasidan esa tushuntirishlar berilmoqda.
“Hududgaztaʼminot” aksiyadorlik jamiyati “Murojaatlar bilan ishlash” boshqarmasi boshligʻi oʻrinbosari tomonidan navbatdagi sayyor qabul Buxoro viloyatida tashkil etildi. Uchrashuvlarning dastlabkisi viloyatning olis hududi boʻlmish Olot tumanining “Eski Olot” mahallasida boʻldi. Murojaatlar mazmuni turli xil boʻlib, jumladan, tabiiy gaz bosimi va taʼminotning ikki bosqichli tizimga oʻtkazilganlikdan asosiy maqsad nimadan iborat ekanligi, tabiiy gazdan foydalanishda xonadonlarda qoʻshimcha gaz jihozlarini koʻpaytirish tartibi va loyihalash jarayonlari hamda boshqa bir qator masalalardan iborat boʻldi. Bildirilgan 10 ga yaqin murojaatlar yechimi yuzasidan esa aniq vazifalar belgilab olindi. Soha mutaxassislari tomonidan tushuntirishlar berildi.
Peshku tumanining “Mustaqillik”, “Navbahor” va “Malishoyak” mahalla ahli va raislari bilan boʻlib oʻtgan uchrashuvda tilga olingan muammolar ham eʼtibordan chetda qolgani yoʻq, atroflicha oʻrganildi, ularning amaliy yechimi xususida aniq taklif-mulohazalar bildirildi. Takliflar esa tahlil qilindi. Isteʼmolchilar tomonidan bildirilgan barcha masalalarga atroflicha yondashilib, tushuntirishlar bildirildi. Ochiq muloqot davomida mahalla fuqarolari tomonidan suyultirilgan gaz bilan bogʻliq hech qanday muammolar yoʻqligi, oʻz vaqtida gaz ballonlari yetkazilayotganligi, bu bilan bogʻliq eʼtirozlarning mavjud emasligi taʼkidlab oʻtildi.
Tizimda murojaatlar bilan ishlashni yanada yaxshilash, ochiq va toʻgʻridan-toʻgʻri muloqotni taʼminlash, har bir murojaat yuzasidan esa aniq taklif, uning yechimini bildirish bugun asosiy maqsad ekan, shu maqsad yoʻlida soha xodimlari joylardagi sayyor qabullarini davom ettirmoqda. Har bir murojaat ijrosi esa nazoratga olinmoqda.
“Hududgaz Buxoro” gaz taʼminoti filiali matbuot xizmati