Maʼlumki, “Hududgaz Navoiy” gaz taʼminoti filiali tomonidan “Gaz taqsimlash stansiyasi – tuman (shahar) chegarasi – yirik hududlari uchastkalarining kirish qismi – isteʼmolchi” zanjiri prinsipi asosida, 41 ta yirik hududlar tashkil etilgan. Mazkur yirik hududlarning kirish qismlariga 46 ta elektron gaz hisoblash uskunalari oʻrnatilishi taʼminlandi.
Filialning texnologik oʻlchov qurilmalaridan samarali foydalanish boʻlimi xodimlari tomonidan kunlik tabiiy gaz hajmlarini nazorat qilib borish boʻyicha qator ishlar amalga oshirib kelinmoqda. Jumladan, Prezidentimizning 2020 yil 24 sentyabrdagi “Tabiiy gaz nazorati va hisobining avtomatlashtirilgan tizimini joriy etish” loyihasini amalga oshirishga doir qoʻshimcha chora-tadbirlar toʻgʻrisida” gi 4840-sonli qarori ijrosini taʼminlash maqsadida 46 ta elektron gaz hisoblash uskunalarining barchasiga modem qurilmalari oʻrnatildi. Natijada onlayn ravishda masofadan yirik hududlarga yetkazib berilayotgan tabiiy gaz hajmlarini kunlik tahlil qilib borish imkoniyati yaratildi. Bu esa ortiqcha ovoragarchilik va sarf-xarajatlarsiz tabiiy gaz hajmini nazorat qilishga xizmat qilib kelmoqda.
– Mazkur tahlillar, hududlarda tashkil etilgan “mahallabay” ishlash tizimi xodimlari uchun ham qulay boʻlmoqda, — deydi “Hududgaz Navoiy” gaz taʼminoti filiali yetakchi muhandisi Mahmud Kenjayev. – Boisi yirik hududlarga qabul qilib olingan tabiiy gaz hajmlarini behuda yoʻqotishlarsiz aholi va ulgurji isteʼmolchilariga yetkazilishida ijobiy samarasini bermoqda. Bundan tashqari, magistral gaz quvurlar boshqarmalariga qarashli gaz taqsimlash stansiyalaridan yetkazib berilayotgan tabiiy gaz hajmlarini haqqoniyligini taʼminlash maqsadida, yirik hududlarning kirish qismlariga oʻrnatilgan elektron gaz hisoblash uskunalari orqali qabul qilib olinayotgan tabiiy gaz hajmlari tahlil qilib borilmoqda.
“Hududgaz Navoiy” gaz taʼminoti filiali texnologik oʻlchov qurilmalaridan samarali foydalanish boʻlimi xodimlari tomonidan mazkur yoʻnalishdagi ishlar davom ettirilmoqda.
“Hududgaz Navoiy” gaz taʼminoti filiali matbuot xizmati