Saytda audio qo'llab-quvvatlash mavjud bo'lib, matnni eshitish uchun ushbu funksiya holatini tanlab qo'ying va kerakli matnni sichqoncha bilan belgilang
Gʻijduvon tumanida 21 079 ta isteʼmolchi suyultirilgan gazdan foydalanadi. 35 kunga bormay gaz ballonlari tarqatiladi. Navbatdagi manzil tumanning “Gajdumak” mahallasida boʻldi. Hududda 2 ta qishloq “Gajdumak” va “Quyi Mirzayon” boʻlib, mavjud 1544 ta xonadon oʻz vaqtida gaz balloni bilan taʼminlanadi.
“Gajdumak” mahallasidagi 2 ta qishloq aholisiga 21241 kg suyultirilgan gaz tarqatiladi. Jarayonlar davomida gaz ballonidan toʻgʻri foydalanish haqida targʻibotlar olib borilmoqda. Ammo alohida taʼkidlaymiz, hududda xavfsizlik qoidalariga rioya qilmay kelayotganlar yoʻq emas. Bu boʻyicha tegishli tartibda yoʻriqnomalar asosida tushuntirishlar berildi. Aniqlangan kamchiliklar esa bartaraf etildi. Tuman boʻyicha kuniga isteʼmolchilarga oʻrtacha hisobda 13 tonna suyultirilgan gaz “Gʻijduvontumangaz” gaz taʼminoti boʻlimi tomonidan yetkazib beriladi.
Quyi Mirzayon qishlogʻining fuqarosi Sunatillo Rahmatov shunday deydi: “Gaz balloni berilganda doim xavfsizlik qoidalariga rioya etish toʻgʻrisida ham tushuntirish berib oʻtishadi. Mana issiq kunlar ham yaqinlashmoqda. Gaz ballonlaridan toʻgʻri foydalanish oʻzimiz uchun juda muhim. Ballonimiz gaz jihozimizdan kamida 2 metr masofada joylashishi kerak. Ammo biz eʼtiborsizlik sabab bu qoidalarga rioya qilmaymiz. Oʻylaymanki, xavfsizlik qoidalariga rioya qilish avvalo oʻzimizning qoʻlimizda”.
Eslatib oʻtamiz, gaz ballonlaridan foydalanish qoidalari haqida Oʻzbekiston Respublikasi Vazirlar Mahkamasining 2019-yil 16-mart kuni imzolangan 226-sonli qarorida batafsil toʻxtalib oʻtilgan.
“Hududgaz Buxoro” gaz taʼminoti filiali matbuot xizmati