Saytda audio qo'llab-quvvatlash mavjud bo'lib, matnni eshitish uchun ushbu funksiya holatini tanlab qo'ying va kerakli matnni sichqoncha bilan belgilang
“Hududgaz Fargʼona” gaz taʼminoti filiali tomonidan aholi oʻrtasida gaz-havo aralashmasi natijasida chaqnash, yongʻin hamda is gazidan zaharlanish holatlarini oldini olishga qaratilgan targʻibot-tashviqot tadbirlari oʻtkazilmoqda.
Jumladan, joylarda tuzilgan ishchi guruhlar orqali gazdan xavfsiz foydalanish maqsadida, kunlik targʻibot tadbirlari tashkil etilgan. Viloyatdagi mavjud MFYlar va aholi gavjum joylarda tabiiy hamda suyultirilgan gazdan xavfsiz, oqilona va tejamkorlik bilan foydalanish boʻyicha suhbatlar, ommaviy axborot vositalarida targʻibot-tashviqot ishlari olib borilmoqda.
Oʻtgan yanvar oyi davomida har kuni 159 nafar ishchi-xodimlar gazdan xavfsiz foydalanish targʻibotiga jalb etilgan. Hamkor tashkilotlar bilan birgalikda 212 ta oʻquv muassasalari (oliy, oʻrta va umumtaʼlim maktablari, MTM, internat va sport majmualari), 15 ta yotoqxona, mehribonlik uylari, mehmonxonalar, 220 ta davolash-profilaktika (shifoxona, poliklinika va sanatoriy) muassasalari, 24 ta teatr va kinoteatr va boshqa koʻngilochar maskanlar oʻrganib chiqildi.
Gazdan xavfsiz foydalanish boʻyicha mahalliy telekanallar orqali 75 marotaba videoroliklar namoyish etildi, 17 marotaba televideniyeda davra suhbatlari oʻtkazildi, 17 ta gazetalarda maqolalar chop etildi, 45 692 ta eslatmalar tarqatildi, 629 ta suhbatlar va seminarlar oʻtkazildi. 92 marotaba bozorlar radiouzellari orqali eshittirishlar berildi.
Tuman/shahar gaz taʼminoti boʻlimlari tomonidan 19 ta “Xavfsiz gaz” Telegram guruhlari ochilgan boʻlib, ushbu guruhlarga hududlardagi mavjud MFY raislari va fuqarolari aʼzo qilib borilmoqda. Doimiy ravishda gazdan xavfsiz foydalanish qoidalari, isitish uskunalari dudburonlarining sozligiga alohida eʼtibor qaratishga oid tarqatma materiallar, videoroliklar joylanib kelinmoqda.