Saytda audio qo'llab-quvvatlash mavjud bo'lib, matnni eshitish uchun ushbu funksiya holatini tanlab qo'ying va kerakli matnni sichqoncha bilan belgilang
Tabiiy gaz yetib bormagan hududlar aholisiga maishiy gaz ballon yetkazish ishlari gaz taʼminoti korxonasi xodimlari tomonidan muntazam amalga oshirib kelinmoqda. Jumladan, bu boradagi ishlar boshqa tumanlarga qaraganda suyultirilgan gaz isteʼmolchilari soni nisbatan koʻp boʻlgan Xatirchida ham belgilagan reja-jadval asosida bajarilmoqda.
Maʼlumot oʻrnida keltirish joiz, tumanda bugungi kunda 29 ming 696 ta suyultirilgan gaz isteʼmolchilari mavjud. Ular orasida olis va togʻli hududlarda yashovchi aholi ham bor. Garchi ob-havoning yomgʻirli kunlarida bunday manzillarga maishiy gaz ballon yetkazishning oʻziga yarasha qiyinchiliklari boʻlishiga qaramay, soha xodimlari ishlariga masʼuliyat bilan yondashadi. Har 35-40 kunda reja asosida mahalla fuqarolar yigʻinlariga maishiy gaz ballonlar tarqatilmoqda.
Tumanning “Angidon” mahallasi ana shunday togʻ yon bagʻrida joylashgan maskanlardan biri. Bahorda bu joylarning koʻrki tarovati oʻzgacha boʻladi. Angidonda 422 ta suyultirilgan gaz isteʼmolchilari istiqomat qiladi.
— Kecha mahallamizga maishiy gaz ballon tarqatildi, — deydi mazkur mahallada yashovchi isteʼmolchilardan biri Ziyodulla Abdullayev. – Yomgʻirli qorli kunlarda yoʻllarimizda transportda yurish mushkul. Shunga qaramay, tumangaz xodimlari kechiktirmay vaqtida gaz ballonlarni yetkazib berish imkonini qilishadi. Bundan xursandmiz, albatta.
Shu kabi tumanning boshqa olis va yaqin mahallariga ham maishiy gaz ballonlar yetkazib kelinmoqda. “Xatirchitumangaz” gaz taʼminoti boʻlimi suyultirgan gaz xizmati boshligʻi Azim Hamdamovning bergan maʼlumotiga koʻra, bir kunda tumanda 12-13 tonnagacha suyultirilgan gaz aholiga yetkazilishi taʼminlanib kelinmoqda. Buning uchun esa 5 ta transport vositasidan foydalanilmoqda.
Joriy yil may oyining oʻtgan davriga qadar esa tumandagi 7 ming 624 ta isteʼmolchiga 152 tonna, 480 kilogramm suyultirilgan gaz yetkazib berildi.
“Hududgaz Navoiy” gaz taʼminoti filiali matbuot xizmati