Saytda audio qo'llab-quvvatlash mavjud bo'lib, matnni eshitish uchun ushbu funksiya holatini tanlab qo'ying va kerakli matnni sichqoncha bilan belgilang
Tabiiy gaz isteʼmolchilariga gazni bir maromda va uzluksiz yetkazib berilishi oʻz-oʻzidan boʻladigan jarayon emas. Bunda soha xodimlarining fidokorona mehnati, jonkuyarligining hissasi katta. 2024-2025 kuz-qish mavsumini betalafot oʻtkazish borasida ham gaz taʼminoti xodimlari oldilariga qator vazifalarni qoʻyib, bajarib kelishmoqda.
Jumladan, “Navoiyshahargaz” gaz taʼminoti boʻlimi tomonidan ham shahar aholisiga tabiiy gazni bir maromda yetkazish maqsadida qator ishlar amalga oshirilmoqda. Birgina “Hayot” mahallasi misolida oladigan boʻlsak, bu yerda 1 kilometr gaz quvurlari tartibga keltirildi. 3 km gaz quvurlarida boʻyoqlash ishlari bajarildi. Bundan tashqari, 2024-2025 kuz-qish mavsumini betalafot oʻtkazish maqsadida yuqori bosimli diametri 159 mmli 1 km gaz quvurlarini rekonstruksiya qilish uchun loyiha-smeta hujjatlari tayyorlanmoqda.
Ushbu rekonstruksiya ishlari bajarilishi natijasida nafaqat “Hayot” mahallasi, balki “Guliston”, “Yangi ariq” mahallalaridagi yetti mingdan ortiq xonadonda tabiiy gaz taʼminoti yanada yaxshilanishi taʼminlanadi.
Shuningdek, mahallada gaz taqsimlash qurilmalari doimiy nazorat qilib borilmoqda. Isteʼmolchilarga bir maromda tabiiy gaz yetib borishi uchun gaz taqsimlash qurilmalari ikki bosqichli tizimga oʻtkazilmoqda.
– Mahallamizda gaz quvurlari tartibga keltirilib, boʻyoqlangan, — deydi “Hayot” MFYda yashovchi Safar Primov. – Yuqori bosimli gaz quvuri rekonstruksiya qilinishi rejalashtirilgani tabiiy gaz yetkazilishida mahallamiz uchun yana bir yaxshi yangilik boʻldi, deb ayta olaman.
Joylarda olib borilayotgan bu kabi tadbirlar aholini uzluksiz tabiiy gaz bilan taʼminlashni koʻzda tutgani bilan ahamiyatlidir.
“Hududgaz Navoiy” gaz taʼminoti filiali matbuot xizmati