Saytda audio qo'llab-quvvatlash mavjud bo'lib, matnni eshitish uchun ushbu funksiya holatini tanlab qo'ying va kerakli matnni sichqoncha bilan belgilang
Bugun “Hududugaz Andijon” gaz taʼminoti filiali tomonidan viloyat boʻyicha 473 mingdan ortiq isteʼmolchilarga 600 mingga yaqin maishiy gaz ballonlari orqali suyultirilgan gaz yetkazib berilmoqda. Barcha isteʼmolchilarga 5 ta gaz toʻldirish stansiya va shoxobchalari orqali suyultirilgan gaz yetkazib berish yoʻlga qoʻyilgan.
“Tumandagi 62 mahalla qatori, “Yuzchinor” mahalla fuqarolar yigʻinidagi 475 nafar isteʼmolchilarni ham bir maromda suyultirilgan gaz bilan taʼminlanib kelmoqdamiz, — deydi “Baliqchitumangaz” gaz taʼminoti boʻlimining aholiga suyultirilgan gaz yetkazib berish xizmati boʻlim mutaxassisi Temurbek. – Suyultirilgan gaz yetkazib berishning onlayn tizimga oʻtish munosabati bilan ushbu mahalladagi barcha isteʼmolchilar toʻla ID karta va ularning 594 dona maishiy gaz ballonlari bar-kodli yorliqlar bilan taʼminlangan. Yil boshidan beri ushbu MFYga isteʼmolchilariga 19 tonnaga yaqin suyultirilgan gaz yetkazib berilgan boʻlib, amalda belgilangan reja 110 foizga bajarilmoqda”.
Viloyatimiz aholi xonadonlari va boshqa turdagi isteʼmolchilarga joriy yilning 1-choragi davomida 24 ming 268 tonna suyultirilgan gaz isteʼmolchilarga yetkazildi. Bu degani, 1 million 213 ming 400 dona maishiy gaz ballonlari “aylanma” usul orqali almashtirilib berildi, demakdir. Oʻtgan vaqt mobaynida, belgilangan rejani “Qoʻrgʻontepatumangaz” gaz taʼminoti boʻlimi 122 foizga, “Oltinkoʻltumangaz” va “Asakatumangaz” gaz taʼminoti boʻlimlari 114 foizga, Boʻston tumani isteʼmolchilariga 106 foizga, Jalaquduq, Paxtaobod tumanlari va Qorasuv shahri xodimlari ham 105 foizdan oshirib bajardilar. Bugun viloyat boʻyicha suyultirilgan gaz yetkazib berishning oʻrtacha davriyligi 40-45 kunga toʻgʻri kelmoqda.
“Hududugaz Andijon” gaz taʼminoti filiali matbuot xizmati