Saytda audio qo'llab-quvvatlash mavjud bo'lib, matnni eshitish uchun ushbu funksiya holatini tanlab qo'ying va kerakli matnni sichqoncha bilan belgilang
Surxondaryo viloyatida suyultirilgan gaz iste’molchilari uchun ID-kartalar joriy etilganiga ham qarib uch yil bo‘ldi. Bu yangi tizim, “Ye-Gaz” onlayn tizimiga ulangach, ta’minotchi uchun ham, mijoz uchun bir qator qulaylik yaratildi. Bu tizimda barcha ma’lumotlar ID-kartada joylangan bo‘lib, iste’molchining oxirgi marta qachon gaz ballon bilan ta’minlangani “Ye-Gaz” onlayn tizimida ko‘rinib turadi. Bunda iste’molchi suyultirilgan yoqilg‘i bilan ta’minlanganiga bir oy to‘lmasdan turib, yangi gaz ballon olish imkoniyatiga ega bo‘lmaydi. Bitta xo‘jalikka faqat bir dona gaz ballon beriladi. Suyultirilgan gaz narxining sun’iy oshirilishiga yo‘l qo‘yilmaydi.
Yangi tizimda aholiga gaz ballon tarqatadigan xodimlar ko‘rsatadigan xizmat hajmi va sifatiga qarab, ish haqi belgilash tartibi joriy etilgan. Bu jarayon ham maxsus baza orqali nazorat qilib turiladi. Mutaxassislarning fikricha, keyingi yillarda gaz ta’minotida yuz bergan o‘zgarishlar iste’molchilar ishonchini oqlashda o‘z samarasini bermoqda. Xususan, sohaga raqamli iqtisodiyotning kirib kelishi shaffoflikni ta’minladi. Hududlarda aholiga gaz tarqatadigan mas’ul shaxslarning ta’minot xaridi uchun iste’molchidan naqd pul qabul qilishiga chek qo‘ydi.
Jumladan, avtomatlashtirilgan tizim joriy etilguncha 20 kilogramm uglevodorodli suyultirilgan yoqilg‘i to‘ldirilgan bitta gaz ballon xaridi uchun belgilangan tartib bo‘yicha 22 ming 400 so‘m to‘lanishi kerak bo‘lsa, aksariyat iste’molchilar xodim qo‘liga kamida 23 ming so‘m tutqazgan. Xodimning 600 so‘m qaytarishiga to‘g‘ri kelgan. Ko‘p hollarda bu qaytim bo‘lmagani xodim va iste’molchi o‘rtasida turli tushunmovchiliklarni yuzaga keltirib, aholining tizimga ishonchini susaytirgan.
Endilikda iste’molchi gaz ballon olganida uning hisobidan 22 ming 400 so‘m yechib olinadi. Iste’molchining telefon raqamiga xarid ma’lumoti haqida SMS xabarnoma keladi. Vohada 8 ta gaz tarqatish shoxobchasi va 3 ta gaz taqsimlash stansiyasi, 400 mingdan ortiq suyultirilgan gaz iste’molchisi bor. Aholiga belgilangan muddatda reja-grafik asosida suyultirilgan gaz yetkazib berish uchun 100 ta “ISUZU”, 2 ta “MAN”, 3 ta “Kamaz”, 2 ta “Schakman” rusumli avtotransport vositasi xizmat ko‘rsatmoqda. Suyultirilgan gaz iste’molchilarining 30 ming 297 nafardan ortig‘i Muzrabot tumanida yashaydi.
Suyultirilgan gaz iste’molchilarimizning bir qismi adirlik hududlarda istiqomat qiladi, – deydi “Muzrabottumangaz” gaz ta’minoti bo‘limi xizmat boshlig‘i Bahodir Ro‘ziboyev . – Bu mijozlarimizni o‘z vaqtida yoqilg‘iga bo‘lgan ehtiyojini qoplashda jiddiy mas’uliyat bilan yondashishni talab etadi. Shu bois qishning sovuq va yozning issiq kunlarida ham bir xil xizmat ko‘rsatishga intilamiz. Gaz ballonlarni o‘z vaqtida yetkazib berish choralarini ko‘ramiz. Biroq, hududlarimizdagi iste’molchilar orasida gaz ballonni vaqtida qabul qilmaydigan yoki kartasiga mablag‘ to‘ldirishga e’tiborsiz mijozlar ham uchrab turadi. Bir yoki ikki iste’molchi uchun gaz ballon tashuvchi texnikaning shu hududga qaytib kelishi tabiiyki, ortiqcha xarajat talab etadi. Xizmat ko‘rsatuvchi xodimlarning vaqti behuda ketadi. Bu muammoning yechimini topish uchun iste’molchilar o‘rtasida ana shu masalaga qaratilgan tushuntirish ishlarini olib boryapmiz. Ularning yangi tizimda gaz ballonlarini qabul qilib olishiga mas’uliyatli bo‘lishni so‘rayapmiz.
“Hududgaz Surxondaryo” gaz ta’minoti filiali mutaxassislarining aytishicha, tabiiy gaz yetib borishi qiyin bo‘lgan mahalla va qishloqlar aholisini suyultirilgan gaz bilan belgilangan muddatda ta’minlash soha xodimlarining muhim vazifasi sanaladi. Bu jarayonda iste’molchi ham o‘z majburiyatini unutmasligi lozim. Aslida belgilangan me’yor bo‘yicha har bir iste’molchiga gaz ballon kamida bir oyda, uzog‘i bilan 40-45 kun oralig‘ida yetkazilishi kerak.
Afsuski, avtomatlashtirilgan tizim joriy etilgunicha ayrim xodimlarning ishiga sovuqqonlik, e’tiborsizlik bilan yondashgani sababli qaysidir hududlarda iste’molchilarga o‘z vaqtida gaz ballon yetkazib berilmagan. Tizimning to‘liq raqamlashtirilgani bunday kamchiliklarga chek qo‘ymoqda. Ya’ni, abonentlarga berilgan ID-kartalar “Ye-Gaz” onlayn tizimiga ulangan bo‘lib, iste’molchiga gaz ballon yetkazib berilganiga bir oy to‘lmasdan yangi gaz ballon olish imkoniyatiga ega emas. Boisi ID-kartaga barcha ma’lumotlar joylangan bo‘lib, iste’molchining oxirgi marta qachon gaz ballon bilan ta’minlangani “Ye-Gaz” onlayn tizimida ko‘rinib turadi. Viloyatda aloqa xizmati yaxshi bo‘lmagan o‘n beshdan ortiq mahalla va qishloq bor. Biroq, bu yangi tizimni aloqa sifati yaxshi bo‘lmagan hududlarda joriy etishning iloji yo‘q, degani emas. Ularning ham suyultirilgan gaz ta’minoti uchun “Ye-Gaz” tizimini faollashtirishda “of-line” tizimdan foydalaniladi.
Masalan, Sariosiyo tumanidagi Kundaijuvoz, Maland, Chosh, Xonjiza, Boysun tumanidagi Machay, Kizilnavr, O‘rmonchi, Ho‘jaydod, Uzun tumanidagi Terak, Anarbuloq, Ho‘jaqursin, Bobotog‘, Tomchi, Sheroboddagi Zarabog‘, Qizil-olma, Chorbog‘, Vandob singari qishloqlarda “Ye-gaz” tizimini faollashtirishda “of-line” tizim yo‘lga qo‘yilgan. Bu holatda iste’molchi yetkazilgan gaz ballon uchun karta orqali hisob-kitobni amalga oshiradi. Lekin, mijozdan qabul qilingan mablag‘ mazkur hududda bazada ko‘rinmaydi. Gaz xodimlari aloqa mavjud hududga chiqqach, “Ye-Gaz” tizim xotirasida saqlangan mablag‘ bazada ko‘rinib, iste’molchining bir dona gaz ballon uchun to‘lovni amalga oshirgani tasdiqlanadi.
Bularning barchasi mamlakatimizda so‘nggi yillarda ish unumdorligi va sifatini oshirib, xalqimizni rozi qilish uchun bosqichma-bosqich raqamli iqtisodiyotga o‘tilayotganining amaldagi samarasi, avtomatlashtirilgan tizim iste’molchi va ta’minotchi o‘rtasida ishonchli ko‘prik vazifasini bajarayotganining yorqin ifodasidir.
"Hududgaz Surxondaryo" gaz ta'minoti filiali matbuot xizmati