Saytda audio qo'llab-quvvatlash mavjud bo'lib, matnni eshitish uchun ushbu funksiya holatini tanlab qo'ying va kerakli matnni sichqoncha bilan belgilang
Joriy yilning 9–12-yanvar kunlari “HGT Training centre” o‘quv markazi tomonidan “Hududgazta’minot” AJ Vaziyatlar markazi, Gaz taʼminoti filiallari Markaziy dispetcherlik xizmati hamda gaz taʼminoti bo‘limlaridagi avariya-dispetcherlik xizmati xodimlarining kasbiy malakasini oshirish maqsadida sohaning ko‘p yillik tajribaga ega mutaxassislari va professor o‘qituvchilar ishtirokida onlayn o‘quv mashg‘ulotlari o‘tkazildi.
Jamiyatning 173 nafar xodimlarini ikki guruhga bo‘lgan holda, tasdiqlangan o‘quv rejasiga muvofiq mashg‘ulotlar olib borildi. Tabiiy va suyultirilgan gaz yetkazib berish nazorati, tabiiy va suyultirilgan gaz hisobini yuritish, hisobotlarni to‘g‘ri shakllantirish va favqulodda vaziyatlarda harakat qilish jarayonlari mavzularida olib borilgan o‘quv mashg‘ulotlari orqali avariya-dispetcherlik xizmati xodimlarida yangi bilim va ko‘nikmalar shakllantirildi. Shuningdek, kasb faoliyatiga mas’uliyat bilan yondashish va sohaga oid qonun hujjatlariga kiritilgan o‘zgartirishlar bo‘yicha umumiy tushunchalar berildi.
Mirzo Ulug‘bek nomidagi O‘zbekiston Milliy universiteti professori Muxamedjanova Lalixon tomonidan “Muomala madaniyati” va “Iste’molchilar bilan samarali muloqot o‘rnatish” mavzularida o‘quv mashg‘ulotlari o‘tkazildi. Mashg‘ulotlar munozara shaklida olib borildi va unda mavjud muammolarga ijobiy yondashuvga erishish yo‘llari borasida ko‘nikmalar berildi. O‘quv mashg‘ulotlari yakunida avariya-dispetcherlik xizmati xodimlari uchun kelgusida ham kasbiy mahoratni oshirish bo‘yicha ilmiy-amaliy o‘quv mashg‘ulotlari tashkil etilishiga kelishib olindi.